د. محمد محفوظ يكتب : كرامات الديمقراطية لا يدركها المستبدون

الدولة: زي العربية .
الدستور هو : الموتور .
والقانون هو : الدينامو .
والرئيس هو : السواق .

والــ ( ٤ ) عجلات هي الـ ( ٤ ) سلطات :
– عجلة للسلطة التنفيذية ( الحكومة ) 
– وعجلة للسلطة التشريعية ( البرلمان ) 
– وعجلة للسلطة القضائية ( المحاكم والنيابات ) 
– وعجلة للإعلام ( المؤسسات الإعلامية ) .

أما النظام الديمقراطي فهو نظام : دفع رباعي 4×4  وبيحتاج عشان يشتغل لـ ( فتيس غرز ) .

وفتيس الغرز وظيفته : ( توزيع الحركة ) من الموتور للـ ٤ عجلات . والوظيفة دي اسمها بمصطلحات السياسة : الفصل بين السلطات

والفصل بين السلطات .. مش معناه إنها تبقى جزر منعزلة . وإنما معناه توزيع الأدوار والمسئوليات فيما بينها .

وهي دي الميزة اللي بيحققها ( النظام الديموقراطي )  إن الـ ٤ عجلات  قصدي الـ ٤ سلطات ، بيبقوا متصلين بـ ( الموتور ) اللي هو ( الدستور ) والـ ( سواق ) بيكون ملتزم بكتالوج تشغيل الموتور .

بخلاف النظام اللي مايتسماش النظام -الديكتاتوري-  اللي بيبقى نظام جر أمامي

يعني عجلتين بس اللي متسلطين على الموتور .
عجلة السلطة التنفيذية، وأختها ( الأنتيم ) عجلة السلطة التشريعية .
أما عجلة السلطة القضائية وعجلة الإعلام ، فمجرورين -متساقين- بيشتغلوا بالتعليمات ومالهمش صلاحيات 
والـ ( سواق ) طايح ومش ملتزم بأي كتالوج .

نظام الدفع الرباعي الـ 4×4  اللي هو : النظام الديمقراطي ، بتظهر قيمته لما تغرز العربية في رملة أو وحلة .

نتيجة إصدار الحكومة لقرارات غير مدروسة أو تعسفية أو إصدار البرلمان لقوانين مهروشة وغير دستورية .

حمادة إمام يكتب: ايران الثورة والدولة (5)

د. أيمن خالد يكتب: مالي على حافة الانهيار

ساعتها بتظهر أهمية فتيس الغرز ، اللي بيوزع الحركة ( السلطة ) بين كل العجلات 

فـ عجلة الإعلام الحر تنشر حيثيات احتجاج وغضب الشعب .

وعجلة القضاء المستقل تلغي القرار اللي مش بالعه الشعب ، أو تبطل القانون اللي مش طايقه الدستور .

يعني ببساطة لو سلطة غلطت أو اتبجحت ، حيكون فيه سلطة تانية تراجع وراها وتصحح لها . فتخرج العربية من المغرز والوحلة المأندلة .

إذن  فتيس الغرز بيوفر فرصة للخروج بشياكة من أي أزمة 

لأن كرامة السلطة المخضوضة بتفضل محفوظة، طول ما ممكن تداري كسوفها ورا يافطة كبيرة، مكتوب عليها بالبنط العريض : احترام نظام الـ 4×4  اللي هو : النظام الديمقراطي ، اللي بيشتغل بفتيس غرز وظيفته : الفصل بين السلطات  يعني توزيع السلطات بندية واستقلالية .

اللي فات ده  مش بيحصل خالص في النظم الديكتاتورية، لأنها وبكل بساطة ما تعرفش حاجة اسمها ( فتيس الغرز )  فـ بتغرز بكل غشومية في وحل قرارات وقوانين الترزية، وكرامتها المنفوخة بيتمسح بيها التراب والطين والأسفلت.

لغاية ما ييجي الوقت  اللي لازم ( البيه السواق ) ينزل جبراً من العربية ، ويزقها الركاب ( الشعب ) لمركز الصيانة ، عشان يتم تحويل نظام الجر الأمامي  لنظام دفع رباعي 4×4  ويتم اختيار ( سواق جديد ) .
سواق عارف قيمة ( فتيس الغرز ) في العربية .
سواق عارف قيمة  وكرامات  الديمقراطية .

فـ للديمقراطية كرامات  لا يدركها المستبدون