محمد كامل خضري يكتب: المجاميع 

الأبطال والأدوار الثاتية صف أول 

فى الإنتاج الفنى السينمائى والمسرحى والمسلسلاتى هناك أبطال العمل الرئيسيين المنتج والمخرج وهم من يختاروا أبطال العمل الذين تتصدر صورهم الأفيشات وتكتب أسماءهم عليها بالبنط العريض وتجد الخناقات بينهم فى من يكتب إسمه أولا ومين إسمه أعرض من التانى.

هناك أبطال الصف الثانى السنيدة أمثال عبد السلام النابلسي ومحمد القصبجى(الشاويش عطية) وسامى سرحان(جد محمد هنيدي فى فيلم وش إجرام) أحمد راتب و مصطفى متولى مع عادل إمام.

المجاميع على قهوة بعرة وفي الشوارع 

أما الباقين فهم المجاميع تلاقيهم قاعدين على قهوة بعرة طول النهار فى إنتظار أوردر ومقضينها شاى وسجاير وحكاوى.

دول  بقى شغالين باليومية فى الفيلم أو المسرحية أو المسلسل وهما اللى رايحين جايين قدام الكاميرات لكن دون أداء أى دور (متكلم)

محمد كامل خضري يكتب: عدى البراميل

محمد كامل خضري يكتب: الحبيب المجهول

المجاميع روح العمل روح الوطن 

لكنهم روح العمل الفنى اللى بيعملوا حس وحيوية للعمل (البياعين فى الأسواق وجنود المعارك وجنود الأمن والمتظاهرين وطلاب الجامعة والمسافرين فى محطات القطارات والمصطافين على الشواطئ وخناقات النسوان الشلق فى الأحياء الشعبية وهكذا…)

هؤلاء هم من لهم شبيه فى واقع الحياة فهم الذين يجلسون فى الميادين الكبرى حاملين بعض الأدوات فى إنتظار من يكلفهم بعمل لساعات أو ليوم أو ليومين.

بتوع كرنوتة الانتخابات ورمضان 

تكسير ، شيل ، حط، وهم الذين يتكالبون للحصول على كرتونة من الجمعيات الخيرية فى شهر رمضان أو فى أيام الإنتخابات.

هم تلاميذ المدارس الحكومية التى فيها كثافة الفصل يتعدى المائة والذين يمثلون الأفندية فى الفترة الصباحى.
الحرامية فى الفترة المسائى وبعد نص السنة يتبادلون الأدوار.

اللى بيتخانقوا فى المدرسة طول النهار ويكملوا خناق برة المدرسة بعد الإنصراف.

هنيدي لما كان مجاميع 

حرب شوارع تذكرت هذا الزخم الذى يزدحم فى رأسى عندما شاهدت يوماً الفنان محمد هنيدي وهو يحكى بداياته وأنه لجأ لأحد أساتذته فى المعهد وهو مخرج مشهور لإعطائه فرصة للظهور فى أى عمل فنى (علشان ياكل عيش)

فوعده المخرج بفرصة فى القريب وفى يوم جاءه إتصال من مساعد لهذا المخرج بأن يحضر لمبنى التلفزيون فى ماسبيرو يوم كذا ساعة كذا للمشاركة فى عمل فنى رمضانى.

لبسوه فرعوني ومسكوه حربة 

جهز هنيدي نفسه وراح من بدرى ماسبيرو وعند البوابة قالوا له ممنوع لغير حملة التصاريح فقال للأمن أنا مطلوب من المخرج فلان… ممنوع… حتى إسألوه… ممنوع.

فلما زاد إلحاحه وبعد عدة إتصالات أدخلوه ولما وصل لمكان العمل وجد من يستقبله ويقذف به إلى أحد العاملين قائلاً له “مجاميع فرعونى”

فأخذه فى غرفة مزدحمة بآخرين وألبسوه لبس فرعونى وأعطوه حربة فى يده وأخرجوهم فى طابور وأصطفوا على الجانبين وهنيدى عمال يصبر فى نفسه ويقول يمكن يعطونى الكلام اللى هأقوله قبل التصوير لكن ماحصلش.

عمو فؤاد رايح يصطاد 

بعد شوية عزفت الموسيقى وإشتغلت الإضاءة والكاميرات بعد أن قسموهم نصفين مصفوفين على كل جانب وفى ممر المنتصف جاء عم (فؤاد المهندس) اللى رايح يصطاد ولابس ملابس إنسان بدائى من الجلد.

وبعد كذا إعادة صاح مساعد المخرج فركش وأرشدوهم للخزنة لكى يستلموا أجر الشغلانة بعد مايقلعوا ويسلموا اللبس !

أحلام انتهت في اللبس الفرعوني 

طبعاً هنيدي أُسقط فى يده وكأن آماله وأحلامه كلها إنتهت فى لحظة وهو اللى كان فاكر نفسه بعد التخرج من المعهد ياما هنا وياما هناك وفى الآخر ترسى على ممثل مجاميع شغال باليومية .. ياللعار !

كل إبن آدم فى مصر تخرج من جامعة مر بهذه اللحظة المريرة.

كلنا مجاميع في مصر

أنا شخصيا بعد ماإتخرجت من الكلية كنت فاكر نفسى هأروح المركز القومى للبحوث أو تتصل بيا وكالة ناسا الفضائية قسم الأدوية لكن لقيت واحد صاحبى بيقول لى بعد ماسألنى تكليفك فين؟!

قلت له فى وزارة الصحة

قال لى أوعى تستلم هتمضى على شوية عهدة عبارة عن حقن بنسلين وحقن ستربتومايسين وبرطمانات سلفا جوانيدين للإسهال وسلفا ديازين للزور والحلْق وشوية إنتيروفيوفورم للإسهال وشوية كيماويات بدرة وسوائل لعمل مزيج كحة ومزيج راوند وصودا.

ولاهتعرف تسافر برة البلد لإنك مش هتعرف تسلم العهدة ولاتخلى طرفك وتلبس فى الحيط يا معلم.

مجاميع بدرجة دكاترة ومهندسين 

ياه معقول ده يحصل ده أنا كنت فاكر نفسى زى ماهنيدى كان فاكر نفسه ولسه علمى طازة بشوكه وقلت لنفسى أنت داخل على دور البطولة على طول أتارينى تبع المجاميع !

مجاميع عمو فؤاد رايح يصطاد أو عمو عبدو زارع أرضه ويوم ماتتمعظم هتدخل مجاميع يوسف شاهين !

الحياة فى بلدنا كده ناس تخش على دور البطولة على طول ودول أبناء الممثلين والمخرجين والمنتجين أما الباقيين فهم المجاميع يارب تكون الأول على الدفعة !

أيها المصري: أنت في كل وقت مجاميع (أو معاميع) 

فيا أيها المصرى إرفع رأسك أو وطيها حسب تعليمات المخرج وأى إعتراض أو نشاز إقلع لبس المجاميع وسلمه وروح الخزنة وخد يوميتك وورينا عرض قفاك !

حبيبى يانور العين لو مش عاجبك شغل المجاميع روح رخم على عمرو دياب وهيلطشك قلم وهتاخد ميتين جنيه.

قلم عمرو دياب ب 200 جنيه يا بلاش 

قلم بميتين جنيه ولو حظك حلو تاخد لك قلمين بربعمية برضو أحسن من اللطعة فى قهوة بعرة فى إنتظار يومية المجاميع.

بتقول إيه؟!
يومية المجاميع بقت بألف جنيه !

أعرفكم بنفسى كاتب المقال مواطن مصرى مجاميع.

ياريت سعادتك تعرفنا بنفسك بطولة والا مجاميع ؟!