محمد كامل خضري يكتب: عدى البراميل
ولكل بحر براميله وبها مابعدها، فى الجامعات فيه براميل فى الوزارات فيه براميل فى الهيئات فيه براميل فى الإعلام فيه براميل وفى الشركات الكبرى
براميل البحر ما بعد قروش وحيتان (صورة وسائل التواصل)
هناك تعبيرات شعبية تلخص صفحات من الشرح فلو تساءلت عن ثروة أحدهم لكانت الإجابة الساحقة اللى فيها الخلاصة ده معدى البراميل !
ولو سألت عن الإنسان الواصل الذى ينهى المسائل بعلاقاته العامة مع أصحاب القرار وهل له علاقة بفلان وهو أحد أصحاب القرار يردون عليك فلان مين ده معدى البراميل !
حتى المجرمون أصحاب السوابق تلاقى الكثيرين منهم معدى البراميل بما له من سطوة وجبروت ولاحدود لإجرامه من الآخر صاحب قلب ميت وبلاضمير !
البراميل لمن لايعرف هى تلك البراميل المتشابكة فى شواطئ المصيف التى تضع من يجتازها فى مرحلة الخطر إلا إذا كان واد عويم وسباح قدير ولو إن البحر مالوش كبير !
فلو سحبنا الخط على إستقامته لقلنا إن ما بعد البراميل يحتاج قدرات خاصة فى معظم بلاد العالم وخاصة دول العالم الثالث والرابع.
قدرات مالية وقدرات بدنية وعلاقات عامة ونفوذ حتى لو تعرض المعدى للغرق تجد الكثير من الأيادى تمتد إليه لتنقذه.
وكل عهد من العهود له حدود براميله فبعضها قريب من الشاطئ وبعضها بعيد عن الشاطئ وأحيانا البراميل على رمل الشاطئ لأنه ممنوع دخول هذه الشواطئ من أصله !
فى يوم من الأيام أوصى السادات الحاج رشاد عثمان يخلى باله من الإسكندرية ده معناه إن مسموح له يعدى البراميل.
فى عهد حسنى مبارك كان كمال الشاذلى ممن عدوا البراميل.
محمد كامل خضري يكتب: كتاب الحياة
وفى أيامنا هذه تجد نخنوخ والعرجانى.
أما هشام طلعت مصطفى فهو عدى البراميل من زمان ومكمل ، بعد البراميل حيث جزيرة إبيستين وأشباهها فى كل دول العالم.
الجزيرة التي تعقد فيها الصفقات،المنطقة الممنوعة على صغار الأسماك من البساريا والشراغيش أمثالنا الإقتراب منها والإطلاع علي مايجرى فيها ولو من باب الفضول.
لو حاولت فإنك غارق لامحالة
ماإحنا حذرناك وأنت اللى جبته لنفسك !
ولكل بحر براميله وبها مابعدها، فى الجامعات فيه براميل فى الوزارات فيه براميل فى الهيئات فيه براميل فى الإعلام فيه براميل وفى الشركات الكبرى.
فإذا كنت فى إحداها فلك مساحة تبلبط فيها كما تريد أو تجلس على الشط لتلعب فى الرمال ولما تيجى جنبك موجة صغيرة تجرى كى لاتبتل.
وتحكى لنا فى السهرة كيف نجوت من الموجة بأعجوبة مع إن الشطارة كل الشطارة تعدى البراميل وتصارع الموج فى البحر الحى وتقدر ترجع حى وفيك نفس، بعد البراميل فيه سمك قرش كبير وحيتان ودلافين وأنت وحظك !
هذه الدنيا فيها ناس بتلعب على الشط.
وناس بتشاغب الموج المكسور اللى أنهكه البحر وتعتبر هذا إنجاز.
وناس عدت البراميل بتعمل اللى بتعمله فى غياب العيون.
شد حيلك يارب تعدى البراميل بس إحترس من أسماك القرش !
