المسحراتى

البطل أيمن حسن

مسحراتى
بصرخ ليلاتي
على طبلة صوتها
آنين ناياتي
أصحوا و فوقوا
لكل آتى
أوجاعنا جارحة
و دموعنا سارحة
أوضاعنا شارحة
من غير ما هاتي
**

أيمن حسن
تعظيم سلاح
لجندي عارف بوصلته
مؤمن
بإن صراعنا مع الصهاينة
مش ع الحدود
لكن صراعنا صراع وجود
مهما باعونا ولاد حرام
باسم السلام
و عارف
إن معاهدة العار و الخيانة
عمرها ما كانت
و لا هاتكون سكة سلامة
أيمن حسن
اسم مكتوب من آهات قلوب الأمهات
محفور بدم الشهدا ف الأرض و السموات
مغروس في جدر عشاقها ولاد وبنات
اصحى يا خال
و يا عم فوق
مسحراتى الغضب
و الاحتجاج
و الشوق
الجدر مادد لفوق
بحلم بفك الطوق
و الصوت يشق الحلوق
و الروح بتنسج
من الجروح موال
الليل طويل
لكن النهار جوال
عايشين يا مصر
في موالك و ما نسينا
يا ألف آه و آهين يا نيلنا
يا ألف آه وآهين يا سينا
لا حدودنا من كل الجهات آمنه
و لا يوم من الأيام رسينا
و نغنى تاني
شوقنا لصبحك
من بعد قمحك
يا مصر و انتي
تاهت ملامحك
و ضيعتني
لكنى عارف
و يغنى عودي
ان مسيرك
في يوم تعودي
و تشدى عودي
حكمة جدودي
من يوم وجودي
انك تجودي
من بعد شدة
انك تعودي
من بعد ردة
وانك مرابطة
ليوم المعاد
مسحراتي بطول البلاد
اصرخ ليلاتي
اصحوا وفوقوا
لكل آتي
رمضان كريم
شهر وعظيم
فيه العظات
والمعجزات
والانتصار
الفجر لازم يولد نهار
واغصبح مولود من نور ونار
مسحراتي
وفي انتظار
الأمة ترفع
راية انتصار
رمضان كريم
يا نايم اصحى
وحد الرزاق