علي محمد علي يكتب: الطمطاية والحرب على إيران؟
حرب إيران يا محترم فلستني من أول يومين تلاتة وخلي بالك من رقم تلاتة الملعون ده لأن يوم التلات الساعة تلاتة البنزين غلا تلاتة جنيه.ده خلا الطماطم توصل ٦٠ جنية مرة واحدة، يعني الطماطماية الواحدة وصلت لييجي عشجنيه.
حروب كتير وما تعدش ورايا
شوف يا ابني أنت وهو أنا راجل داخل على ٥٤ سنة ، يدوب اتولدت وبعد ٦ شهور وأيام حضرت حرب ٧٣.
وبعدها عد مش عاوز أقولك حضرت حروب كتير أوي مش عاوز أتلغبط في ترتيبهم، حضرت حرب فيتنام ٧٥ ، الحرب الأهلية اللبنانية.
هوب دخلنا الحرب العراقية الإيرانية، الغزو السوفيتي لأفغانستان، حرب الخليج الثانية ، حروب يوغوسلافيا، حرب الصومال الأهلية، حرب أفغانستان، غزو العراق.
ثم قمت الثورة في تونس وبعدها ثورات، هوب قامت الحروب الملحقة بالربيع العربي، روسيا وأكرانيا ، غزة والكيان، ميانمار.
من يوم ما تولدت العالم مولع
أيوه زي ما بقولك كده كله ضرب ضرب ماكانش فيه شتيمة.
يعني أنا من يوم ما اتولدت والعالم تقريبًا مولع في بعضه.
ما بلحقش يا حبة عين أمي أرتاح سنة واحدة من غير حرب.
كل حرب خدت مني رقات، واستنيت في حرب يوغوسلافيا واحدة بوسنية لكن على حظي كانت الحرب خلصت وروحوا بلدهم.
قلت متعوضة في الحرب إللي بعدها، لكن ما حصلش نصيب.
المهم كل الحروب إللي فاتت دي كلها كوم والحرب إللي دايرة دلوقتي دي كوم تاني، ليه بقه يا عم الحاج؟ تعالى أقولك.
الحرب والطماطم
أولا كل الحروب إللي فاتت ما أثرتش على جيبي، حتى وأنا صغير في ٧٣ جاني هدايا وعديات لوز اللوز وجيوبي كانت عمرانة،.
إلا حرب إيران يا محترم فلستني من أول يومين تلاتة وخلي بالك من رقم تلاتة الملعون ده لأن يوم التلات الساعة تلاتة البنزين غلا تلاتة جنيه.
ده خلا الطماطم توصل ٦٠ جنية مرة واحدة، يعني الطماطماية الواحدة وصلت لييجي عشجنيه.
الكذب شغال على ودنه
ثانيا في كل الحروب إللي فاتت كان كل طرف يطلع يقولك بكل شفافية خسايرنا كذا وكذا ، إلا في حرب إيران الكذب شغال من جميع الأطراف عيني عينك.
محدش عاوز يعترف لا بهزيمة ولا بنصر.
كأنهم متفقين مع بعض علينا.
في كل الحروب إللي فاتت كان فيه فائز منتصر يعني وكان فيه مهزوم مغلوب يعني.
كنا فاكرين أمريكا حميانا طلعت مستغفلانا
إلا في حرب إيران، فجميعهم منتصرون ما عدا العرب، ياناس طيب إحنا قلنا أمريكا حميانا، طلع المستغطي بأمريكا عريان ، يا ناس أمريكا مفهمانا وبتحلبنا طول السنين إللي فاتت وقالتلنا إيران مين وبتاع مين ، طلعت أمريكا مش عارفه تسيطر على تورموس… هورموس … هورمز .
أنا هنا فكرت قولت أبعت جواب للمنيل ترامب وأقوله رجع فلوس ولاد عمي وارفع إيدك يا عمنا.
ها نبعت رجالة باب الشعرية يفتحوا هورموز
الليله دي مش ليلتك، وبالفلوس إللي هاترجع نأجر نفرين ولاد حلال من عندنا يروحوا يفتحوا المضيق ويعدوا الشوية المراكب المتعطلة إنشاله من ناحية سلطنة عمان أهي مننا وعلينا.
حد قالي ما ينفعش دا لسة السلطان هيثم واقف عند السادات ومش عارف مين الريس بتاعنا.
هو مين مع مين
كل الحروب إللي فاتت كان ليها زعماء ما بيموتوش.
إلا في حرب إيران بسم الله الرحمن الرحيم قتلنا الروس الكبيرة.
هو فيه إيه يا أمريكا أومال هانستمتع إزاي وإنتي كومتي كل اللعيبة الخبرة.
كل الحروب إللي فاتت كان فيه فريقين كل فريق مع طرف.
إلا في حرب إيران محدش عارف مين مع مين؟
وكله عمال يخبط في كله.
الواد فؤاد ساب ضرب الخليج وجاي ع مصر
ياراجل دا الواد فؤاد ابن الهاشم ، أيوه أخو البت إياها ساب الضرب في بلده والدق إللي على دماغ الكويت وجاي يعد الكلاب في مصر.
هو فيه إيه يا ولاد الكلب !
تايه في الحرب دي
و الأغرب إني اكتشفت ناس بتوع ثقافة وكانوا شيوعين غيروا المسمى الوظيفي بتاعم وبقوا شيعيين.
يا مثبت العقل في النفوخ يارب.
لأول مرة من يوم ما اتولد أبقى تايه في حرب.
أنا كل إللي أنا عاوزه دلوقتي حد يجاوبني على السؤال : أشجع مين، وإزاي ؟
طيب سيبك من ده حد يقولي مين إللي فاز؟
بلاش حد يقولي الطماطم هاترخص إمتة مش عارف أعمل سلطة.
