أنس دنقل يكتب: دوران ارضي! دنيا مقلوبة

دنيا كورة تلف..لامخلية اللي راكب ..راكب ولامخلية اللي ماشي ماشي.. بكيف كيفها..زلزال..زلزال علي رأي عمك المطرب المرحوم محمد رشدي في اغنيته المعروفة..

دنيا ترفع اقوام ..تخفض اخرين بدون سبب ..ناس..قديما لم تعرف السراويل الداخلية باعتبارها كماليات لالزوم لها بتكتم علي نفسها .. اصبحوا يغيروا كل سنة احدث موديلات :عربيات..فيلات..بدون سبب!!

مومسات بطيارات ويخوت وحرس وحكومة!!

علما..اساتذة جامعات..ولاد ناس..شحاتين.. تسرح تشحت ع القهاوي..جزم لبست الناس جزم.. سفينة ربانها دهول واحمد جموسة..

علي راي الحكيم قال:

عشان مانعلي ونعلي ونعلي لازم نطاطي..نطاطي!! المشكلة حتي لو تطاطي مش ح تلاقي مكان تطاطي فيه الا السجون.

كل درجات الوطيان مشغولة ..محجوزة مقدما لخمسين سنة كبيسة قدام لاحفاد احفاد الاسياد المماليك الجدد!!

فقرا تضرب اللي افقر منهم بالمركوب القديم.. نمل يركب نمل.تبوس علي ايد الحرامي والكداب والسمج والمنافق.

رجال دين_ من كل الاديان_ تبوس وتسبح بحمد كرباج الباشا..تطحن الفقير هريسة في طاحونة صاحب الكراخانه !!

ناس مش لاقية مكان للعزب والابعديات والمحاسيب..فلوس كابسة علي الانفاس..كاتمة فتحات الشرج..ثروات تحت الافخاد.

ناس تنكش في التراب تدور علي حبة درة واحدة تسد جوع عصافير بطنها مش لاقية حبة درة ولا تراب ولاعش ولا شربة مية !!

ملك مسيره سيدك..ربك يجيب العواقب سليمة..يطلعنا منها علي خير !!

ختام : يحكي ان ليلة القدر طلعت للحمار والبغل والهدهد..

الحمار دعي ربنا: يارب اجعلني ملك البهايم ..ربك استجاب..

البغل دعي ربنا: يارب اجعلني وزير ع البهايم !!

فاضل مين معانا ؟؟!! عمك الهدد ..دعي ربنا وقال: يارب موتني..خدني قبل مااشوف حكم البهايم !!

بس واضح ان عمك الهدد عاش وشاف كتير قبل ما ربنا يحقق امنيته وياخده..ربنا ياخده ويريحه ويريحنا !!

ربك يحسن ختامكم وختامنا اجمعين !!