رسالة من غزة: أعظم 4 دقايق في تاريخ كأس العالم على الإطلاق

دقائق من كأس العالم 

بطلها المدرب الأوفى والأرجل والأعظم في تاريخ مصر والعرب والعالم، الكابتن حسام حسن،  في المؤتمر الصحفي من قلب أتلاتنا الأمريكية، قبل لقاء الأرجنتين:

نقلت كلماته بنفسي حرفيا:

“في أوروبا أو أمريكا لو فيه حيوان حد قسى عليه أو أذاه، بتطلع حقوق الإنسان والحيوان والدنيا كلها، لكن لما كل يوم آلاف يتقتلوا وأطفال ونساء.

أحنا بنكون قاعدين في تكييف وقصور وشقق والأكل قدامنا، وأطفال وشعوب قاعدة في خيم في الشتا والصيف والشمس.

واحنا لما تكون الدنيا حر بنبقى عايزين تكييف ومروحة، ولما تكون الدنيا شتا عايزين بيت مقفول ودفايات وغطا.

خالد علي يكتب: رسالة إلى منتخبنا الوطني وجهازه الفنى قبل مباراة الأرجنتين

عبده فايد يكتب: كلمة حسام حسن للتاريخ

الشعب الفلسطيني قاعد في العراء

يعني أطفال، مبيصعبش عليهم أطفال بنشوفهم مش لاقيين ياكلوا؟ اللي هم في مرض ووباء من قلة الأكل، وقلة اللقمة، وقلة العيشة، فانا لو محسيتش كبني آدم، يبقى مليش لزمة إني أنا أعيش!

أي بني آدم على وجه الأرض محسش باللي بيحصل في فلسطين بغض النظر عن هو مسلم مسيحي يهودي يبقى مش بني آدم، مينفعش يعيش.

وإذا أصرينا إن احنا نغمض عينينا بدون ما ناخد قرار، والناس اللي في إيدها القرار تحط نفسها وولادها يوم واحد يقعدوا يوم واحد بس في المطر والشمس والسقعة، يجربوا بس هيعيشوا ازاي!

إحنا لما بتحصل سيول بس هنا الناس بتتدارى وتجري

لكن السيول بتحصل في غزة وبتحصل في فلسطين والناس مش لاقية حاجة تتدفى بيها ولا تحتمي من الشمس.

فانا بقول عار علينا كلنا، عار على العالم كله مش على الوطن العربي بس

عار علينا كلنا، وعار على صحاب القرار اللي سايبين بني آدمين زينا زيهم.
إحنا كلنا زي بعض، لينا عينين ووش وراس وجسم، يعني الناس دي عادي جدا يتقتل منهم 3 أو 4 آلاف يتضربوا في صاروخ؟

عادي ماتوا! واحنا هنا،

الشعوب كلها بما فيهم أوروبا وأمريكا بنبص على حاجة تانية، والناس بتوريلهم صورة تانية خالص.
بغض النظر عن الأديان، احنا بنتكلم عن لما بتتعاملوا مع حيوانات لما الحيوان يتئذي، لما تشوف فيديو حد أذى كلب أو حيوان في الشارع، كلنا هنخش نقول لازم يتسجن لازم يتحاكم، طب اللي بيقتل الناس؟

طب الصاروخ اللي بينزل دا ويقتل ناس؟

بغض النظر عن الديانات، أنا مش بتكلم على إسلام ولا مسيحية ولا يهود.

أنا شعوري اللي طلع دا طلع من نفسي كدا لأني بني آدم، إنسان، زي الناس اللي بتموت، زي البني آدمين اللي بتموت.

أنا إنسان قبل ما يكون هويتي إيه وديني إيه، عربي ولا أجنبي ولا أيا كان!

رسالة من خلال كرة القدم، الكرة الناعمة في العالم، أرجوكم أرجوكم، كل الرياضيين والإعلاميين بمختلف دياناتهم ومختلف دولهم، يمكن من خلال كاس العالم نبعت رسالة.

خلوا الشعب الفلسطيني يعيش، يعيش

هم مش عايزين غير يعيشوا بس، فلو سمحتم من خلال الإعلاميين الرياضيين المحترمين، عادي، الفيفا تقول لك “ريسبكت وفير”، عايزين “ريسبكت” للبني آدم يعيش، وعايزين “فير” للشعوب تعيش”