زمن السرقة الجميل!

سلي صيامك مع التاريخ :

كانت السرقة مهنة لها “شيخ” و “رخصة”!

لو اتسرق بيتك.. بدل ما تروح القسم تعمل محضر وتتبهدل، روح لـ “شيخ المنسر” كبير حرامية بلدكم يرجع لك حاجتك بـ ‘الحلاوة’!!

العصر المملوكي والعثماني،  السرقة حرفة منظمة جداً للحرامية طايفة  نقابة لها ريس عمنا الكبير شيخ الحرامية !!

الحرامي الكبير

كبير الحرامية لم يكن مجرماً مطارداً لا لا شخصية معروفة محترمة مسجلة عند الوالي يمكن ثاني شخصية مهمة بعد شيخ البلد او العمدة عين اعيان البلد !!

ضمن مؤهلات شغله الوظيفة المرموقة كونه من عائلة قوية كبيرة حتي لا يستخف به السفلة والدهماء امثالنا..

مسئول عن كل سرقة تحصل في البلد!

يعني لو صحيت الصبح لقيت بيتك مسروق بقرتك جاموستك.. تروح بمنتهي الادب لشيخ الحرامية تقول:

_ياكبيرنا..يابا الحاج.. اتسرق مني كذا وكذا أمبارح

يفتح دفتر المسروقات يسأل الصبيان : ‘مين شغال في المنطقة دي أمبارح يا ولد؟’.

الحرامي اللي سرقك يجي بنفسه، يجيب المسروقات قدام عينك حضرتك مظبوط كده تمام؟.. تمام
_عليك كذا..
مفيش فصال شقا ناس ورزق ناس..خشوم عايزة تاكل ياواد عمي !!

تدفع “المعلوم” وانت ساكت.. اسمه ‘حلاوة’ أو ‘جُعل’.. تستلم حاجتك !!

_الف الف شكر يا عم اعمام حرامية مصر ربنا يبارك فيك ويزيدك ويكتر من امثالك الطيبين..يخليك لينا سند يارب..تمشي وأنت بتدعي له!!

لصوص لكن محترمين :

كان للصوص قديما ميثاق شرف للمهنة :

_ الحرامي التابع للطايفة لا يمكن يسرق حد من بلده مرتين في الشهر..عيب..سرقة واحدة من الهلال للهلال !!

_لا يسرق جاره !!

_لو حد حرامي غريب.. من بلد تانية سرق في منطقتهم جريمة شيخ الحرامية يقبض عليه ويأذيه..عليه حق عرب بيقطع عيشنا..بيشتغل في غير محل عمله بدون اذن او تصريح مزاولة مهنة او دفع اتاوة بعدين عيبة في حق البلد كلها !!

ايام زمان المهنة لها اصول وأساتذة الصنعة باظت..لمت وعكت يسرقوا حصر الجامع ومراكيب المصلين ويفكوا كباية الكولدير المربوطة بسلك كهربا !!

اغتيال المهنة الجميلة:

علي يد محمد علي باشا الله لا يسامحه الغى نظام طوائف الحرامية..تاميم السرقة قال: ‘يا نشتغل سوا.. يا نبطل سوا’.. قضى على المهنة تماماً أسس الشرطة النظامية الحديثة كما نعرفها حاليا !!

عمد ومشايخ معظم البلاد عينوا الحرامية السابقين غفر حكومة بعضهم تاب الله عليهم اكتفوا براتب الميري رغم ضالته باعتبارها لقمة حلال..

البعض من الحرامية أصحاب الطموح العالي رواد العمل الحر استغل السلاح الميري المسلم بمعرفة الحكومة اقرضه قرضا حسنا لحرامية البلاد المجاورة نظير حصة من المسروقات في كثير من الأحيان بمعرفة وتواطؤ ومباركة عمد البلاد وكبارها اهو كله مصلحة  دخل قومي حتي شاع مثل: حاميها حراميها !!

من الناحية الرسمية انتهت وظيفة شيخ المنسر لكن من الناحية الفعلية مازالت قائمة ومزدهرة في كثير من المحروسة ومدنها واحيانا كثيرة بمعرفة وتنسيق مع الاجهزة الرسمية واليكم هذه الذكري:

ذكري قديمة:

منتصف سبعينات القرن الماضي ميدان العتبة القاهرة صحبة شقيقي الأكبر “امل” التقينا المرحوم المناضل الشيوعي الكبير فتحي الرملي_ والد المؤلف المسرحي لينين الرملي وشقيقه ستالين الصحفي بجريدة العمال وقتها _ سرقت حقيبة أوراقه ونقوده عند حلواني “ويلسون” الشهير بالميدان !!

متجهين لقسم شرطة الموسكي لعمل بلاغ بالحادث.. التقينا صحفي صعيدي صديق مشرف علي الصفحة الدينية بإحدى كبريات الصحف القومية !!

اخبرنا الصحفي : لا داعي  لتضييع الوقت مع اقسام الشرطة ع الفاضي تعالوا معايا الحاجة المسروقة ح نرجعها النهارده !!

شارع فرعي معظم شاغليه سودانيين عربية مرسيدس خنزيرة امام باب العمارة احدث موديل لا يركبها الا الاكابر !!

_ الحاج فلان موجود ؟

مكتب الحرامي الكبير

احد الناضورجية سبقنا للطابق الأعلى يافطة منورة: مكتب خدمات عامة شحن وتفريغ !!

سكرتارية موظفين فراشين بمجرد ما تم ابلاغ مولانا باسم الضيف فتح المكتب سريعا خرج ابن عمنا: المسؤول الكبير لاستقبالنا والترحيب!

البيه  اربعيني ابن عمنا صعيدي قوي البنية.. احدث بدل وقمصان بشل وجروح قديمة بالوجه يدان غليظتان تنبأن عن طفولة غير سعيدة!!

بعد الترحيب والمشروبات الساخنة والباردة الاستفسار عن سبب القدوم شرحنا له الموقف داس ع الجرس
_أبعتوا هاتوا فلان ..يجيب الشغل !!

ربع ساعة مش اكتر قضيناها في الدردشة عن أحوال الصعيد والاهل حضر المذكور

_ يا حاج فتحي حاجتك وفلوسك مظبوطة..تمم عليها؟؟!!

الحاج فتحي يحاول دفع مقابل!!

_عيب يا حاج ..انت كده بتشتمنا.. جاي مع البهوات قرايبنا عيال عمنا وتعمل كده لو طلبوا رقبة الواد ده نديها لك لم فلوسك  لم !!

شهم من يومك يا ابن عمي اثناء الحوار حضر واحد بلدياتنا وقريبي بالاحضان.. حرامي معيز سابق قبل انتقاله للقاهرة يعمل الان بالمكتب مشرف اجتماعي مشروعات اسر منتجة تغيير عملة حشد انتخابي موسم الانتخابات الخ .. كشكول !!

المكتب: نطاق اختصاصه وسط القاهرة سرقة نشل تسول تغيير عملة حجز  مستشفيات تذاكر قطر وطيران خدمات حكومية.. شهر عقاري ضرائب تأمينات رواتب شهرية لمن يهمه الامر صلاحيات اكبر من محافظ القاهرة!!

تنسيق كامل مع الاجهزة الامنية وتحت رعايتها : قضية راي عام مطلوب متهم لاسكات الصحف المغرضة..سرقة شخصية مهمة مطلوب سرعة اعادة المسروقات!!

اكتر من عشرين سنة امضيتها صحبة قريبي وتحت رعاية مكتبه وهذا المحسن الجليل..قبل ان يتوفي قريبي والكبير ويغلق المكتب رحم الله الجميع ..

الحمد لله بارك الله ذريته الطاهرة ابنه الأكبر يوصل مسيرة عطاء السيد الوالد سياسي مرموق استاذ دكتور لا اعرف في ماذا؟؟ ربما في التنمية البشرية ضيف دائم علي البرامج الحوارية التليفزيونية حفظه الله لنا ذخرا:

“وينشأ ناشئ الفتيان منا.. علي ما كان علمه ابوه!!”