لجنة خاصة قصيدة الشاعر مصطفى الجارحي

لجنة خاصة
…
أجمل ما فيكي
إن انتي لسّه بعيد
شايفاني وانا باستلم
نايبي من الجنّة
شكلي كأنه سعيد
وانا باخد الصورة
وروحي باينة معايا مكسورة
والاَّ مش باينة
باين قوي على قلبي إنه جديد
منفوش وزاهي وكأنه
اتعافى م التجنيد
نده الملاك بالميكروفون على اِسمي
ردّيت بصوت رسمي أبدًا ماكانش قليّل
عمره ما يشبه صوتي وانا عيّل
ولا حتى يشبهله وانا في ريعان الصبا
الخطوة بينّا شوفتها قريّبة
مديت إيديّا ساعتها في جيوبي
رجعت لي بالأحباب واحد ورا التاني:
عشرين نبي يشهدوا
بإني عشت حزين
وميتين وَلي يأمّنوا
ويقولوا م العاشقين
ألفين من التانيين بينكروا عيوبي
مدّيت إيديّا فـ جيوبي من تاني
رجعت لي تاني بالشجر والطير
بموسيقى دايمًا بتسبقني فـ صباح الخير
قال الملاك: اِركن هنا هنبت في أمرك
فوقفت زي الغريب ولو انّي مطّمن
وقفت مطّمن ولو انّي لسّه غريب
في لساني طعم الزبيب
عين م العسل تشرب
والتانية تغرف حليب
حاسس بإن انتظاري هيطوّل
طمّنت نفسي بإني تعبت ومذاكر
لو حتى عادوا اللجنة م الأوّل (!)