أنس دنقل يكتب: الشيطان شهيدا!

قصة قصيرة قديمة لعمنا توفيق الحكيم كتبت منذ مايقارب المائة عام،عنوانها الشهيد (يقصد ابليس)

لم اقرأها، قرأت فكرتها في صفحة صديقنا الدكتور محمد عبد العاطي، اعدت كتابتها بطريقتي اللي زي الزفت لامؤاخذه وكالاتي:

الشيطان تعب من الشغلانة بتاعته وكراهية الله والبشر الطيبين له (عايز يتوب)

فكل عيل او راجل او ست يعم له مصيبة يقول :

“الشيطان وزني”

وعلي راي اخوك الشيطان:

“يعملوا بلاوي يحتار هو عملوها ازاي، يبقي نفسه يروح يتلمذ ويدرس عند بعض اخواتنا البني ادمين!”

الشيطان قرر يتوب،يعتزل الشيطنة،الشغلانة مش جايبه همها ولمت، وعلي ايه يعني،انا قررت ارجع لربنا واتوب واعمل خير!!

أنس دنقل يكتب:  في علوم الندالة!

يعمل ايه اخوكم ابوالاباليس، قال :اروح لزعماء الاديان الثلاثة !

خد بعضه راح للبابا في روما
_ عايز اتوب ياابونا..
_ تتوب ازاي ؟!! في العهد الجديد والقديم مكتوب انك ملعون، تغوي البشر،ازاي تتوب يعني؟ مش ممكن..

_ نفسي اتوب ياابونا واستريح واعمل الخير.

_ تتوب ازاي يا ابليس يابن الفرطوس،والاف الكنايس والقسس واديرة ورهبان واباء كراسي اعترافات يشتغلوا ايه؟! امشي قوم،انجر من عندي، احسن اخبطك بالكرسي في دماغك افتحها،الم عليك امة لاالله الا الله!!

يعمل ايه عمك ابليس

خد بعضه، سافر اسرائيل لكبير الحاخامات، نفس الكلام، انتهي بقوم امشي يابن الكلب،يعني انت ياشيطان لماتتوب احنا نبقي شعب الله المختار علي مين ؟! امشي يا اما اقبض عليك واحطك في التخشيبة !!

مفيش قدام جدو ابليس غير القاهرة ..فضيلة مولانا شيخ الازهر..

_ انت شايف قدام عينيك،مساجد وخطبا وائمة،مقيمين شعائر وخشوم مفتوحة عايزة تسترزق وتاكل.

وزير اوقاف لسانه ناقص، يفصل جبه وقفطان كل جمعة يتصور في التليفزيون.

يخطب كل مرة في قناة شكل ويقول:

اعوذ بالله من الشيطان الرجيم،ازاي افهم الوزير ان حضرتك تبت؟ طيب ح يعوذ من مين بعدك ياغالي ؟!

بعدين اعمل ايه في بتوع تجديد الخطاب الديني،ابراهيم عيسي وبنت ناعوت وبرامج تليفزيونية في قناة الحرة:

مختلف عليه ومتفق عليه،الجماعة دول يشتغلوا ايه لما انت تعمل الخير ؟!

ابعد عني الله لايسيئك، هي مش ناقصاك أنت، إلاقيها منك ولا من غيرك !!

عمنا ابليس مالقيش فايدة في الارض، قال اسأل الملايكة في السما.

راح لسيدنا جبريل..ماتنساش ياجبريل يابن عمي ..احنا زمايل..نفسي اتوب ..اطيع ربنا واعمل الخير ؟؟!!
سيدنا جبريل قال له: انت لو تبت منظومة الثواب والجزاء ح تختل..لو تبت كده بتتخلي عن دورك في منظومة الحياة..ماينفعش خالص!!

من يومها عمك ابليس بيعتبر نفسه شهيد يؤدي مهمة مقدسة ليرضي عنه الله..

عشان كده القصة اسمها الشهيد

واضح جدا ان الشيطنة فكرة ترضي جميع الاطراف وتفتح ابواب الارتزاق،

مرحبا بك ياعزيزي الشيطان في ديارنا بيتك ومطرحك واهلك وناسك.

اقعد اعمل لك فنجان يانسون يهدي اعصابك، نورتنا يا الف مرحب ياغالي !!

اذا كانت القصة لم تعجبكم ..ارجوكم روحو قابلوا المرحوم توفيق الحكيم في قبره..ناقل الكفر ليس بكافر يااخوانا !!