المسحراتى (4) : الشهيد محمد صلاح المصري

أشعار عبد المجيد راشد

دقيت على طبلتي
على طبلتي دقيت
و صحيت على ندهتي
و بندهتي صحيت
يا قلوب ملاها الشوق
للعدل و الحرية
يا طريق و مليان شوك
أرواحنا لسه عفيه
الفجر نوره و نداه
جوه زهور شيلاه
تنشر عبيرها ف هواه
تملا حياتنا حياه
دقيت على طبلتي
من قلب حلم اتولد
مسحراتي ليلاتي
سارح بطول المدد
الصوت يرجع صدى
و الصبر ابن الجلد
بدد يا نور عتمتي
طبطب على طبلتي
يروى الندى سكتي
و الحلم يطرح بلد
**
عمار يا مصر عمار
و بطلنا م العمار
شامخ كما النخيل
أسمر فارس جميل
عبر ليلنا الطويل
و جاب لينا الصباح
محمد يا صلاح
تعظيم سلام سلاح
على روحك يا أصيل
ف الجنة يا شهيد
حى و ضى و طريق
قلب و بوصلة كفاح
عارف إن السلاح
ما يفله إلا السلاح
اسمك سكن القلوب
يا محمد يا صلاح
عين شمسك يا بطلنا
سكنت في روح نهارنا
قالت كل الكلام
يا نور عيون بلدنا
يا صبرنا و جلدنا
لروحك السلام
رافع رايتنا لفوق
مسحراتي الغضب
و الإحتجاج
و الشوق
الجدر مادد لفوق
بحلم بفك الطوق
من ليل غميق لشروق
والصوت يشق الحلوق
و الروح بتنسج
من الجروح موال
الليل طويل
لكن النهار جوال
يا ألف أه يا نور
يا ألف آه يا نار
من مشمشك يا عمار
طلع بطل مغوار
فتح طريق النور
نفخ فى روح أحرار
و عمار يا مصر عمار
صورته على الجدران
و ساكنة في قلوبنا
دا فارس الفرسان
و رمز لشبابنا
باب السما مفتوح
و عند ربك حي
ورد الشهادة يفوح
يفتح طريق للضي
ومهما زاد العناد
لكل فجر معاد
مسحراتي بطول البلاد
أصرخ ليلاتي
اصحوا و فوقوا
لكل اتى
رمضان كريم
شهر و عظيم
فيه العظات
و المعجزات
و الانتصار
الفجر لازم يولد نهار
و الصبح مولود من نور و نار
مسحراتي و فى انتظار
الأمة ترفع راية انتصار
رمضان كريم
يا نايم أصحى
وحد الرزاق